المقالة الاولى من مجموعة مقالات اتعلم يا فري لانسر
ناس كتير بتسأل هو يعني ايه فري لانسر ويعني ايه اشتغل فري لانس ؟
بداية نحب نوضح حاجة مهمة جدا جدا جدا ان الفري لانس دا مش مجال الفري لانس دا مفاده انك بتشتغل في مجال بس شغل حر غير مقيد بمواعيد عمل رسمية ووقت وروتين زي الموظف يعني ممكن تكون ديزاينر وفري لانسر وممكن تكون مسوق وفري لانسر وممكن مصور او مونتاج او مترجم او داتا انتري او ويب ديزاين او حاجات كتييييير اوي مجالاته كتير جدا هنتكلم عليها بعدين
في 5 حاجات مهمين لازم يعملهم الفري لانسر ويكون عارفهم كويس
1- اجيب الشغل منين
لازم تبقي عارف تجيب الشغل منين ايه المواقع اللي فيها شغل عن الفري لانس بشكل عام وهنتناول المواقع دي تباعا في المقالات القادمة ان شاء الله.
2- هستقبل الفلوس ازاي
لازم يبقالك حساب تستقبل عليه الفلوس حساب الكتروني وحساب في بنك وهنوضح النقط دي بتفصيلها هنقولك بالتفصيل وخطوة خطوة ازاي تعمل حساب علي paypal وانظمة الحسابات في البنوك وافضلهم ايه.
3- لازم تحدد المنتج او الخدمة اللي هتقدمها كفري لانسر
انت ممكن كفري لانسر تقدم خدمة او منتج ولو خدمة هتعرضها ازاي وهتزود ايه الميزة التنافسية فيها..طب لو منتج هتشحنه ازاي وتشتغل في الاستيراد والتصدير وعمليات البيع داخل مصر هنكلمكم بردو عن طرق التجارة الالكترونية.
4- لازم تنضم للـ community المناسبة اللي تفيدك انك تطور نفسك باستمرار كفري لانسر في مجالك المسوقين مثلا يشوفوا هما بيجتمعوا فين دايما والديزاينرز وغيرهم وغيرهم وهكذا.
5- انك تدور علي mentor ليك او حد يبقي دايما بتتعلم منه ودا سهل اوي تلاقيه في عصر Linkedin موقع لينكدان هو موقع تواصل اجتماعي بس احترافي شويتين يعني من الاخر الناس داخله تكلم بعض علشان شغل او تتعلم من بعض وتستفيد .. لينكدان زود ميزة الفترة الاخيرة وهي انك تقدر تختار الـ mentor بتاعك او الشخص اللي تتعلم منه ويكون قدوة ليك في المجال بتاعك ودا تقدر توصله من خلال اللينك دا https://mentor.linkedin.com
ادخل وهتلاقي ناس كتير متميزة في مجالها اختار المجال اللي انت عاوزه وتواصل مع الناس بمنتهى السهولة وابدأ اتعلم منهم كل جديد في المجال دا هيفيدك جدااا كفري لانسر.
تابعوا المقالة الجاية هنتكلم عن الحسابات ولازم يكون عندك حسابات ايه كفري لانسر وازاي تعملها علشان تبدأوا معانا في التنفيذ العملي مجموعة المقالات دي مش مجرد مقالات علي الانترنت لا دي مقالات للعمل بها عمليا :)
